تغطية الأمسية الشعريه للشاعرين سلطان بن معجب ومحمد بن مرزوق على شرف محافظ الخرج

[الإدارة]

السلام عليكم ورحمه الله وبركاته

الحمد لله رب العالمين ، والصلاة والسلام على خاتم الأنبياء والمرسلين ، المبعوث رحمة للعالمين، محمد وعلى آله وصحبه أجمعين . أما بعد :

يسر ويتشرف موقع آل زايد الرسمي

أن يقدم التغطية المصوره للأمسية الشعريه الذي ينظمة مركز السيح بمحافظه الخرج على شرف صاحب السمو الملكي الأمير عبدالرحمن بن ناصر

وقد تلقت إدارة الموقع من اللجنه المنظمه للأمسية الشعرية دعوه بتغطية الأمسية الشعريه الذي احياها كل من الشاعرين


الشاعر سلطان بن معجب الشكرة
الشاعر محمد بن مرزوق الخضران


مساء يوم الأربعاء 11/3/1431هـ


قام بمتابعة الأمسية وتغطيتها وتنسيقها

مراقب الموقع سالم بن شتوي الحراجين
مراقب الموقع ناصر بن عبدالله الفرجان

---

الشاعر سلطان بن معجب




الشاعر سلطان وهو يلقى قصيدته

يبست عروق نجـد وعينهـا فـي سماهـا=لاهو من قـل مـاء ولاهـو شـراً بلاهـا
لا أنخفاض أقتصاد ولا تضخـم بضايع=بس سلطـان مبطـي خدهـا مـا وطاهـا
بعـد غيبتـه زاد أبهـا الحـزن وألتبسهـا=من كثـر حزنهـا واسـا قمرهـا ثراهـا
كـل مومـن رفـع يــدًه ولله دعـالـه=والمنابر صـلاة الصبـح ساقـت دعاهـا
يـوم قالـو هـل الاخبـار بانـه تشافـا=نحمد اللي لامـن دعتـه الامـه عطاهـا
يوم سافرت وقلـوب الشعـب سافرتلـك=الحكومـه جنـود وشعبـهـا ووزراهــا
كلنا من أصغر الورعان لين الكهالا=سيـدي دون روحـك ونتسابـق فـداهـا
ياعـمـود السعـوديـه وروح العـدالـه=يـا أسدهـا ولدهـا يـا أميـر أومراهـا
يا نهر جارياً كلن تعنا وجاله=تارده من لفـت ضميـا وتقطـع ضماهـا
ياوزيـر الدفـاع ويـا وزيـر العطـايـا=لـو تجاكـرك نـاسٍ بالعطـا مـا مداهـا
غيـرك يمـد طفسـه ويتفـاخـر بـمـده=لا أحتسب فيها أجر ولا سلـم مـن غثاهـا
وانت مديـت دولـه تستغيثـك بـا أهلهـا=جيتهـم وأهـم جوعـا وأتجـرًو أفقراهـا
لين حتى العجـم قامـو يتسمـون باسمـك=أبحثـو اسمك أكبـار الـدول وأخبراهـا
لين صار أسمك يـدرس جميـع المناهـج=درسـوه بمنـاهـج لاذكـيـا والبـلاهـا
سيدي ما أنحصر بحر العرب كيف بحرك=لا أنحصر موج ماك ولا أنحصر موج ماها
وش تقول البيـوت وش تقـول القوافـي=دون فعل العضيم اللـي عضمتـه خذاهـا
أنت انسان لـو يبحـث مزايـك من كان=ما انصفك لوكتب مـن صبحهـا لامساهـا
بـس هـاذي مشاعـر شاعـرٍن بالنيـابـه=عن بلاده بـلاول وعـن ربوعـه وراهـا
ربعـه اللـي ومنهـم السـدارى خوالـك=والله انـا بخـوالـك نفتـخـر وانتبـاهـا
الدواسـر هـل الطالـه طـوال اليمانـي=مـا يشكـك بمنهجهـا ولا فـي ولاهــا
هـم سنايـد معـزي يـوم وحـد بلـدنـا=ليـن حـدد حـدود المملكـه وأحتمـاهـا

تـدور الايـام والدنيـا رحاهـا يـدور=تحـت نـاس وتبدلهـم بنـاسٍ جــداد
ديدنها الاصلي تقـدس فانيـات الامـور=وأكثر عبـاد الله تكافـح وتجمـع رمـاد
لو تعرف العايشه أمنيـة أهـل القبـور=لا كان كـل المساجـد ضايقـه بالعبـاد
ينـادي الله بعـج وقـل مـاء ودهـور=صوتً ينادي لكـن الـي ينـادى جمـاد
لاهين في جمع مال وفي عمار القصـور=يـا عامريـن البـلاد مفارقيـن البـلاد
الادمـي قدمـه الدنيـا محطـة عبـور=عابر سبيـلاٍ نزلهـا مالـه ألا حصـاد
مثله مثل طير فوق الجـو يتبـع طيـور=والموت قناص ومجهز يده فـي الزنـاد
بدايته خرقتٍ بيضـا وضحـك وسـرور=ونهايته خرقتٍ بيضـا وحـزن وحـداد
وحنا نعرف الوضع هذا وكـل الامـور=ما نجهل إبها ولكن كـل هـذا مـا فـاد
لنا مع مسجل السيات وصـل وحضـور=نشغله من يوم نصبح لين وقـت الهجـاد
وراع الحسانات يجلس وقت وهو مهجور=وأن جات حسنه فهي رحمه مهيب أجتهاد
لكـن عزائـي بـأن الله رحيـمٍ غفـور=من وسع رحمته ما فك البحـر يـوم راد
يهلك هل المعصيه والفسق واهل الفجور=تقول بينهم وبيـن امـره تعالـى عنـاد
فيالله ياعلمـن مـا قـد تكـن الصـدور=ياباسطٍ سبع ورافـع مثلهـا لـك عمـاد
أنك تخلي في وجهي نور و في قلبي نور=وتجعلي من زاد حسناتك مع النـاس زاد

الغالي الي حروف أسمه على لسانـي=ماني مصرح علـى أسمـه ولا منـوه
أخاف مـن كلمـةٍ لارحـت تقفانـي=من واحـدٍ دفـش ولا واحـد مفـوه
أستر على سرنا ستري على أخوانـي=كلـه ولا سمعتـي وسمعتـه تتشـوه
ولا الغلا فار فـي قلبـي وشريانـي=ألقاه في أسفلـه وألقـاه فـي علـوه
أنسانـةٍ تبتلـي أخـوهـا لنسـانـي=تشغله في نفسـه وتثـر علـى جـوه
بستانهـا المزدهـر خوخـاً ورمانـي=يكملـه بالـحـلا فـضـه ولـولـوه
خلونـي أتقفـص بذكـراه و أعانـي=لـو التذكـار مـن عوائـق السلـوه
أذكر بيـومٍ مـن ألايـام قـد جانـي=وحذرته من الزمن خيره ومـن سـوه
أقـول قبـل تسـوي شـي تنصانـي=وتقوللي ويش بتسـوي وأقـل سـوه
حتى رفيـق القفـا لا شـب نيرانـي=يموت في علته ويمـوت فـي ضـوه
لكنـك أسرفـت بالهجـران وألهانـي=مراقبك وأنت في غربه وفـي خلـوه
لين الهوا الصلف هب وحت ألاغصاني=نسـاك ألارقـام والعنـوان والخـوه
أن جيت نـادم تبـي قربـي بتلقانـي=وأن رحت عني فـلا حيـلا ولا قـوه

الشاعر محمد بن مرزوق الخضران




الشاعر محمد بن مرزوق وهو يلقى قصائده


بلاد الدين

بسم الإله الواحد الخالق المعبود =عظيم الصفات ومعتلي جل سبحانه
إلهٍ نعبده طاعة وله مسلمين اسجود =نخافه ونرجي من ثوابه ورضوانه
يدور الفلك بأمره وعلمه بليا احدود =ولا غيره أحدٍ يعلم الغيب وأزمانه
على ما يبي ويريد في وصفه المحمود =تساوى على عرشه كما لآق في شانه
يقدس بالأسماء الواردة في الكتاب تسود =تعظم صفاته كلها دون نقصانه
خلق كل ما في الكون ما فيه شي يكود =على الله مادام الكائن الرب من كانه
هو البارئ القادر هو الدايم الموجود =وغيره مخاليقٍ ٍ لها يوم هلكانه
نسيّر ولا نخيّر وعمر البشر محدود =مضى أمره على خلقه وهم تحت سلطانه
خلقنا وأمرنا نصدق بيومه الموعود =وحنا نصدق كل رسله وقرآنه
تعهد بحفظ إكتابه وبيته المشهود =وبيته بأمآن وسورة الفيل برهانه
بقت قبلة الإسلام والحج فيها احشود =يجيها أمم تطلب من الرب غفرانه
تؤدى مناسك حج في وقتها المحدود =يجيها الملبي محرمٍ تارك أوطانه
حمى الله ( بلاد الدين ) والقبلة المقصود =بلاد الحرم في حفظ ربي وبامآنه
بلادٍ على التوحيد قامت وعندي شهود =ترى بكل حي ٍ مسجدٍ تسمع أذانه
تحكم بشرع الله ما هو بحكم بنود =هنا ... منهج الإسلام وتْطبّق أركانه
حكمها الموحد بالهنادي وبالبارود =حماها وطهرها من الشرك وأوثانه
على منهج الإسلام قاد المعارك قود =تسوقه عقيدة دين من قوة إيمانه
عبد العزيز أمؤسس الدولة ابن سعود =عساه بجنان الخلد وتَبْرّد أكفانه
بناها وراحت من سنين الزمان أعقود =وداره على تأسيس نهجه وعمرانه
تسلسل عياله والأسد جاء محل أسود =تتالوا بعد مامات في حفظ ألامآنه
وفي عهد أبو متعب كريم النباء والجود =سحابٍ على العالم حقوقٍ بودانه
بناء من صروح العلم منهل بخير يعود =على أمة الإسلام مفتوح بيبانه
إذا صارت الأيام في عين شخص ٍ سود =زبن يم بحر ٍ بالعطاء بدد أحزانه
وإذا الله خلق أتوام متلاصق ٍ مولود =علاجه تكفل به ويلقى له إحضانه
إنشوف شعبه كل يوم ٍ يجيه أوفود =رفع قدره الوالي بتقدير شيبانه
غيثٍ يعم الشعب ما ينحجز بسدود =كريم ٍ وراعي الخير ما يجحد إحسانه
حزام الملك – سلطان – يبقى سند وعضود =عداه الخطر وأقول له صحة أبدانه
أنا بترسل واسمحوا لي بدون قيود =أنا مواطن وكل ٍ يعبر بوجدانه
أبنقا قصيدي مثل ما نقاء بطيب العود =وبأخذ سمين البيت يرجح بميزانه
يجمل قصيدي مدح شيخ ٍ عريب أجدود =وأنا الشاعر إللي بالذهب صاغ قيفانه
يطيب المدح واليوم ماظن عنه أصدود =أبمدح كريم – الطيب نهجة وعنوانه
سلطان نهر ٍ والعطاشا عليه أورود =يروي ظمأ نفوس ٍ من الوقت عطشانه
سلطان الفرج ... هو نصرة المعسر المضهود =كريم العطاء وكفه من الخير مليانه
كثير الفضايل والكرم فارق ٍ بزود =ويا كثر منهُ عايش ٍ تحت جنحانه
ولي العهد وإنّا نقدم ولاء وعهود =وحناء معه ونفوسنا بيّده إرهانه
دون أرض الوطن ناقف جميعاً وحنا جنود =تحت أمر أبو متعب ومربوط بإعلانه
حماةَ البلاد وجيشه إمدربين فهود =جيوش ٍ تبيد إللي تبين بعدوانه
دخل في الحدود الحوثي وماله أي أوجود =لقى له رجالٍ تعشق الموت طربانه
تسلل عصابه بأمر قايدهم المقرود =عدامه تقدامه إذا خان جيرانه
فاعلاء جبل دخان ولاَّ جبال الدود =لقى حتفه بدخان ولاَّ بزنزانه
والنائب الثاني يجي القاف له مردود =جنوده أمن حراس بعيون سهرانه
نايف وزير الأمن حامي الحمى ويذود=يقضي على الإرهاب وابليس واعوانه
الاهارب ماله عندنا خانة ٍ مصدود =مرفوض عند الكل وعند أية إديانه
كثير الدول فيها رُعْب والأمن مفقود =وحنا بأمن يارب لا تجيب فقدانه
يغيب المواطن عدة شهور ولا تزود =أمان ٍ على بيته وماله وورعانه
نعيش بنعم وبخير وسهود وايضا امهود =يعود الشُكر للّه من دون نكرانه
عمارٍ ديار المملكة شعبها محسود =كفاها اللَّه اعيون الحسد وأية إخيانه
وأخر كلامي بهدي زهور وأهدي أورود =مع المسك والعنبر أبحط ريحانه
وعسى كلنا نشرب من الكوثر المورود =وكل ٍ يشوف الرب ويمتع أعيانه
وأصلي على محمد شفيعٍ لنا موعود =وأبي إللي سمعنا حاضر ٍ ينطلق إلسانه

هواجيس

يامرقب ٍ جريتنا فيه منكوس=يوم الخميس اعصير تالي نهاره
يهبني في رأس مبداه نسنوس=وينزاح عن قلب هموم وحراره
ينساح به صدري ولو كان محسوس =واغيب مع الأفكار تاره وتاره
ويرتاح قلب ٍ من عناء الوقت محبوس=يسوق في شوف السعاده بشاره
ماهمه الدنيا ولا همه فلوس =ومافكر بجني الذهب والتجاره
كسبه من الدنيا تجاريب ودروس=وتجرعّه دنيّاه كأس المراره
دنيا كفى الله شرها تقلب الروس =من يلّدغ منها بياخذ حذاره
أحد ٍ عمي وشخص ٍ تضوَح بفانوس=ورجل ٍ بصير الرأي واخر إغراره
ورجل ٍ ملوّع حظه أقشر ومنحوس =يبغاه يكسب له وجاب الخساره
يالآدمي رزقك مقدّر ومقيوس=ومالك عن المقسوم لوبك شطاره
وإللي من الدنيا ماخذ غير ناموس =قسمه مع أهل الطيب رأس الفقاره
ياكسب ٍ الطيب ثبت لك ارسوس =فعلك على روس النوايف مناره
للطيب ساس وفي المناعير مغروس =هاذي صفات الشيخ وإلاّ لماره
الطيب للرديان ماهو بمريوس=يصعب على اللي ما براسه نعاره
تبدلت عادات بشكال وطقوس =مدري تخلف علم وإلا حضاره
شبابنا إللي يقلب الثوب ملبوس=نسوا سفير النفس مثّل دياره
تشوف عيني شي ماشيف مدسوس=أغضي وخلي كل شخص ومساره
أدري أنا بالعلم لو كان مدموس=وأضفي على سر الحقايق ستاره
سّر العرب ماطاح بيدين بالوس=وحر ٍ فطين ٍ يكتفي بالاشاره
الناس حساسه لها شعور ونفوس =وكسر الخواطر ماتفيده اجباره
يامشرب ٍ صافي ولاهو بمحيوس =عسر ٍ على الظميان في رأس قاره
يهبه الغربي ولا وصله اعسوس =الصفح من تحته ودونه وعاره
فريد بوصّافه وبالدين محروس=ويميز الماس الثمين النداره
ذكراه تغزيني مع الليل عسوس =وتنزاح في صبح ٍ تنفس نهاره
الحب سلطان ٍ وتبقى له ارموس =تظهر مواريه وتفضح اثاره
حالي برى منه غدى كنه القوس=حب ٍ على حالي يسبب دماره
الحب محسوس ٍ ولا هو بملموس=مشاعره سم ٍ تفيض بغزاره

وأخيراً نسأل الله التوفيق والنجاح لشاعرينا ونتمنى قضاء أطيب الأوقات وأمتعها

إدارة موقع آل زايد الدواسر الرسمي

[عاشق هريســــــــــان]

صح الله اللسان الشاعرين

ولله يبيض وجيهم

ونشكر الإداره على تغطية هذه الأمسية

والله يبيض وجه المراقبين

ناصر بن عبدالله الفرجان
وسالم بن شتوي الحراجين

على جهودهم بالتغطيه

[سالم ابن عفنان]

بيض الله وجه الشاعر سلطان معجب وصح لسانه وبيض الله وجه محمد مرزوق على قصيدته بلاد الدين
وكلي شكر لادارتنا الواعيه واشكر سالم بن شتوي وناصر بن عبدالله
وياااااااالبى الخرج واهلها

[ابن حنيش الودعاني]

صح الله السنة الشعار
وبيض الله وجيهم ووجيه من قام بالتغطيه
الشكر موصول لادارة المنتدى على الجهود الجباره


تقبلوا مروري

[فرحان بن مبارك الشكرة]

صح الله السنة الشعار
وبيض الله وجيهم ووجيه من قام بالتغطيه
الشكر موصول لادارة المنتدى على الجهود الجباره

[الفايز]

وعليكم السلام ورحمة الله وبركاتة

نشكر الشاعرين / سلطان بن معجب و محمد بن مرزوق على تشريفهم لقبيلتهم في هذا المحفل
الكبير ونقول لهم بيض الله وجيهكم و لا يستغرب الفعل الطيب من اهلة و إلى الأمام...
نشكر الأدارة الموقرة على هذه التغطية المتميزة كما عودتنا دائماً
ونخص بالشكر اخواننا المراقبين / سالم بن شتوي الحراجين و ناصر بن عبدالله الفرجان.

تقبلوا فائق تحياتي وتقديري
اخوكم الفايز

[محمد الولامين]

بيض الله وجهه كل من قام على تغطية هذي الامسية الرائعه وصح لسان الشعار المشاركين على القصايد الجزله والطيبه

والشكر موصول للأدارة على الجهود الطيبه

[فالح الخضراني]

وبيض الله وجيهم ووجيه من قام بالتغطيه
الشكر موصول لادارة المنتدى على الجهود الجباره

[سعود بطحيه الودعاني]

اهلا وعليكم السلام يابو سعد
مرحبابك خاصه وب الجميع عامه
لكن عندي سوال المشاركات الذي في المنتدى
قد القيت وخلصت أم هي باقيه في تاريخها 11 . 3 . 1 3 4 1

[براك المخاريم]

صح لسان الشاعرين سلطان الشكرى ومحمد الخضرانى

ولاهنتو يااداره المنتدى وجعلكم قووين على هالتغطيات الرائعه

وبيض الله وجه سالم بن شتوى الحراجين وناصر بن عبد الله الفرجان فلا غرابه فى جهودهم الطيبه فهم من اركان هذا الصرح الزايدى بارك فيهم وفى جهودهم

وبارك الله فى اداره المنتدى فهم فى الحقيقه من خيره الاداريين

وتقبلوا منى هذا الرد المتواضع

اخوكم براك المخاريم